ꂱꏠꃚꏠꇁꌊꄚꑟꄮ，ꌺꃰꂶꌠꆏꊰꄚꒉꈯꄔꇬꃹꁧꀐ。ꂱꏠꉇꌺꇓꄿꆏꋋꇅꃅꐂꄚꒉꇬꊐꄉ，ꋍꁁꏯꆏꌺꃰꂶꌠꇴꅷꐺ，ꋍꁁꏯꆏꀋꇝꃅꁨꉜꄉꒈꏸ。ꃚꏠꀋꁙꑐꈚ、ꂷꑦꇊ、ꂵꉌꄜꈬ、ꉇꌺꑿꄿꏤꇖꑻꌠꑌꐂꄚꒉꇬꊐ，ꋀꊇꉬꑻꐯꇯꊋꇤꏡꇤꄉ，ꐂꒉꇬꃹꁧꌠꌺꃰꂶꌠꋀꈻꅔꇬꅞ。ꉎꏯꂷꉐꀉꇨꃅꐛꐛꅹꃅ，ꋋꄹꉇꒊꃀꆹꒈꅐꄉꋀꊇꀱꉈꑴꋍꏮꁁꏯꑟꇁꀋꄐ。ꋋꇅꇬꆏ，ꃛꊸꅇꈨꄉꇁꌊꄚꑟꌠꑦꃔꌤꃅꊿꆳꂾꀄꊭꌠꌊꄉꌺꃰꐂꒉꇬꃹꁧꂶꌠꋀꊇꌞꌌꄚꒉꆸꈈꄉꇁꉚꌠꋚꉁꊿꈧꌠꁵꇈ。ꅑꅸꀋꃅꑟꌠ，ꌺꃰꐂꒉꇬꃹꁧꂶꌠꆹꀑꇬꁧꏖꐨꀋꐥ，ꏢꑭꍈꀉꄂꆸꐔ。
ꍤꄻꄉꈨꇬ，ꌺꃰꐂꒉꇬꃹꁧꋋꂷꆏꋍꀉꂿꌋꆀꐯꊨꇉ，ꑮꃀꏭꆸꉈꄉ，ꎧꅝꎧꑱꈭꐨꆏꊨꏦꉪꀋꁥꃅꄉꐂꄚꒉꇬꃹꁧꌠ。
“ꆏꀋꃅꑲꆀꈍꒈ？ꀁꇬꀉꂿꀉꄉꑠꆏꉘꌊꑠꒈꒊꇬꈝꐮꈨꀋꉬ，ꑱꈐꑠꃅꉽꂷꐥꇬ，ꆏꇫꁌꀋꒉ，ꊨꏦꀑꇬꂶꌠꇫꈴꁧꑲꆏꌤꆿꂥꀘꄎꌠꅀ？ꉢꆏꒈꄮꇬꑮꃀꇯꆏꀋꐥꑴꌦ！”ꂱꏠꆹꉌꊫꑌꃅꄉꌺꃰꐂꒉꇬꃹꁧꋋꂷꏯꉙꂘ，ꋌꇬꇇꀨꄉꐥꐨꀂꏽꉌꊋꑌꎻ。ꊁꄽꂫꆏ，ꂱꏠꉂꑟꅑꃅꉙꂘꌠꇂꃴ，ꌺꃰꋋꂷꆹꀊꅰꃅꇨꇅꀋꃃꀐ，ꉈꑴꆏꂱꏠꋋꈭꋏꌠꏭꈀꎭꀕꄷꉉ。
“ꈀꄸꉬꄿꂿꀑꇬꂷꇫꈴꁧꇬꆹꊽꉌꂵꐛꀋꐛ，ꈜꀕꇈꉡꆹꏠꍤꂷꉬ。”ꉇꌺꇓꄿꆹꑠꃅꄉꉉ，“ꈀꄸꑌꐯꇯꊋꇤꏢꇤꌠꀋꉬꑲꆏ，ꉢꀉꄂꇬꆹꋋꈭꋏꀋꄐ，ꋋꆹꉪꊇꐯꇯꊋꇤꌠꐛꅹ，ꀊꅰꃅꄉꄚꇇꀨꇁꌠꌤꃅꐋꀨꈧꌠꈀꎭꀕ！”
ꀑꇬꆹꁌꇐꈤ，ꋍꇅꇬꇨꇅꃃꄉꉌꆐꊁꆹꅑꌠꃅꂵ！
